Është ndërprerë greva e aktorëve të Teatrit Kombëtar të Kosovës të cilët ditë më parë kishin njoftuar se nëse nuk realizohet kërkesa e tyre për rritje pagash në nivel universitar, nga sot nuk do të kishte më shfaqje në këtë institucion, shkruan KultPlus.

Mirëpo sot është arritur marrëveshje ndërmjet Ministrisë së Kulturës dhe aktorëve rezidentë të Teatrit Kombëtar të Kosovës për rritje pagash.

Përmes një konference të mbajtur sot në Ministrinë e Kulturës ku të pranishëm ishin ministri Kujtim Gashi, kryetari i Shoqatës Sindikale të TKK-së Ismet Azemi dhe disa nga aktorët e TKK-së, u njoftua se pas takimeve disa ditore që i kishin mbajtur kanë ardhur në përfundim të një zgjidhje.

Ministri Gashi tha që Teatri është në grevë pas një neglizhence të vazhdueshme.

“Pas disa takimeve të ditëve të fundit kemi arritur një marrëveshje me Shoqatën Sindikale të TKK-së ku kemi arritur marrëveshje për rritjen e pagave. Ndërsa Ministria e Kulturës do të bëjë të pamundurën që aktorët krijues dhe performues të teatrit,nga muaji janar të kenë paga të dinjitetshme”, është shprehur Gashi.

Ndërsa Ismet Azemi nga Shoqata Sindikale e TKK-së konsideroj që kjo është hera e parë që hapet dera e Ministrisë së Kulturës për institucionin më emblematik, siç është Teatri i Kosovës.

Të dy palët u zotuan se gjatë tre muajve do të mundohen të arrijmë qëllimin e tyre. / KultPlus.com