Rexhep Mitrovica, aktori i njohur nga Franca me origjinë nga Kosova do të jetë pjesë e Edicionit të 48-të të Festivalit mbarëkombëtar të Teatrit që mbahen këtë muaj në qytetin e Ferizajt, i cili nis më 21 tetor 2018.

Së bashku me Mitrovicën në Ferizaj do të zbarkojë edhe aktori tjetër i njohur kosovarë që jeton në Francë Arben Bajraktaraj.

Të dy janë pjesë e shfaqjes “Le Pont” inskenuar në Francë sipas romanit “Ura me tri harqe’ të Ismail Kadaresë në regji të Simon Pitaqaj.

Fatmir Hyseni, drejtori i Teatrit “Adriana” të Ferizajt e cila edhe është organizatore e festivalit, ka thënë për Kallxo.com, ka konfirmuar se këtë vit shfaqja “Le Pont” vjen si shfaqje mysafire nga Franca.

“Shfaqja mysafire “Le Pont”, është e dramatizim i romanit të Kadaresë nga Simon Pitaqaj, dhe do të jetë në gjuhën Franceze. Në Kosovë paraqitet për here të pare aktori i mirënjohur Rexhep Mitrovica”, ka thënë Hyseni, duke shtuar se festivali që nisë më 21 tetor të këtij viti do të mbledhë trupa teatrove nga mbarë hapësira shqiptare.

Përveç kësaj sipas tij, edicioni i 48-të i Festivali mbarë kombëtare të Teatrove në Ferizaj do të sjellë edhe aktivitete tjera për dhe rreth teatri, si një seminar me temë për teatrin apo teatrot tonë, performanca, tryeza e festivalit, mbrëmjet tjera artistike.

Festivali mbyllet më 28 tetor 2018 me ndarjen e çmimeve. / KultPlus.com