Inva Mula, sopranoja shqiptare dhe krenaria e shqiptarëve, do të jetë folëse në TEDxPrishtina.

Ajo është e para folëse e zbuluar nga ekipi organizativ i ngjarjes që do të mbahet me 7 tetor në kryeqytet.

Mula do të përcjellë para publikut tregimin e suksesit por edhe vështirësive që ajo ka hasur, në një format si TED – ku folësit tregojnë rrugëtimin e tyre dhe i cili mund të inspirojë miliona njerëz në mbarë botën.

Inva Mula është e njohur për performancat e saj në La Boheme, Otello, Pagliacci, Faust dhe Carmen. Ajo është ndër shqiptaret më të njohura në botë dhe një zë që ka tronditur skenat më të mëdha operistike në glob, shkruan KultPlus.

Kësisoj, Prishtina me datë 7 tetor do ta ketë mundësinë dhe privilegjin ta dëgjojë për së afërmi një emër si Inva Mula. Mula, në vitin 1997, pati sukses kur këndoi në Rigoletton e Verdit, krahas emrave si Leo Nucci në Operën e Marsejës.

TEDxPrishtina pritet të zbulojë folësit tjerë të këtij edicioni ditëve në vazhdim. / KultPlus.com