Sopranoja kosovare Marigona Qerkezi është vlerësuar me çmimin special në garën e 4-të të këndimit operistik në Portofino të Italisë.

Qyteti i vogël italian i njohur për limanin piktoresk dhe resortet luksoze, për një javë qe nikoqir i garës në mes 250 këngëtarëve lirik që vinin nga 48 shtete të botës.

Emra të njohur të botës operistike kanë gjykuar këngëtarët, teksa roli i kryetarit të jurisë i është besuar Dominique Meyer – drejtor i Shtëpisë Shtetërore Operistike të Vjenës. Përmes një statusi në Facebook, Qerkezi ka thënë të ndihet e nderuar për fitoren në këtë garë të rëndësishme.

Sopranoja Qerkezi është përzgjedhur në mesin e 40 këngëtarëve që do garojë në prestigjiozen “Operalia”, konkurs i cili drejtohet nga Placido Domingo, e që këtë vit do të mbahet në Lisbonë të Portugalisë nga 27 gushti deri më 2 shtator. / KultPlus.com