Pas sukseseve të shumta, shfaqja ‘Hollyshit’ me regjisor Ilir Bokshin dhe aktorë Adrian Morinën e Ylber Bardhin, tragjikomedia e bazuar në “Gurë në xhepat e tij” nga autorja Marie Jones, do të rishfaqet përsëri, por tani vjen në qiell të hapur në sheshin ‘Skënderbeu’ në Prishtinës, shkruan KultPlus.

“Hollyshit” përmes personazheve të ndryshme në mënyrë shumë të saktë ironizon dhe nxjerrë në pah një situatë e cila në realitetin e përditshëm kalon pa u theksuar. Shfaqja është e zhvendosur në një pjesë të Irlandës, ndërsa flet për një qytezë-provincë e cila “pushtohet” nga një produksion hollivudian të cilët vijnë për të xhiruar një film. Statistët hollivudian duke qenë shfrytëzues, në anën tjetër dalin edhe si përçmues të statistëve irlandez.

Në qendër të storjes janë Çarlli Konllon dhe Xhejk Kuin, të cilët sikurse shumica e banorëve të qytezës, janë punësuar si statistë filmi. Komedia rrjedhë nga përpjekjet e produksionit që të krijojnë një “ndjesi provinciale” – një nocion romantik, i cili shpesh bie ndesh me realitetin jetësor.
Kjo shfaqje pati një jehonë të madhe me fitimin e çmimit për regjinë dhe aktori më të mirë në festivalin ‘’KoKo Fest’’ dhe prezantimin në vendin e njohur si “Producers Club Theaters’’ në Neë York.

Rishfaqja e “Hollyshit” në ambient të hapur është mbështetur nga Komuna e Prishtinës. / KultPlus.com