Besa Shahini sot zyrtarisht ka pranuar detyrën e Ministres së Arsimit, Sportit dhe Rinisë në Republikën e Shqipërisë, shkruan KultPlus.

Këtë ministri deri tani e ka drejtuar Lindita Nikolla, me të cilën Shahini ka punuar për 15 muaj si zëvendësministre. Shahini përmes një postimi ka deklaruar se Nikolla e ka drejtuar këtë ministri me shumë kurajë dhe durim.

“Kurajën për të marrë vendime të vështira që sollën ndryshime të mëdha në sistemin arsimor dhe durimin për të dëgjuar dhe konsultuar të gjithë hisedarët para se të merrte ato vendime. Unë shpresoj që këto virtyte të më përcjellin dhe mua në zbatimin e kësaj detyre të rëndësishme, sidomos në këtë moment sfide që ngërthen në vetvete edhe një mundësi të madhe për të realizuar idetë më të mira për arsimin shqiptar”, ka shkruar Shahini në postimin e saj./ KultPlus.com