Diamantet blu, si i famshmi “Hope” që i përkiste mbretëreshës Maria Antuanet, janë ngjyrosur nga oqeanet e lashtë dhe janë një provë më shumë e mekanizmit gjigant të riciklimit të kores së tokës, sipas një studimi të botuar në revistën “Nature” të kryer nga grupi i shkencëtarëve të koordinuar nga Evan Smith, i Institutit Gjeologjik të Amerikës, si dhe nga Fabrizio Nestola i universitetitit të Padovas.

Këta xhevahire ngjyrosen nga një element i pranishëm në ujin e oqeaneve, që quhet boro, që bie në thellësi ku edhe krijohen këto diamante, transmeton ata.

Analizat e mineraleve të bllokuar në diamantet blu, me prejardhje nga Afrika, India, Amerika e Jugut dhe Borneo, kanë zgjatur dy vite dhe tregojnë se xhevahiret janë krijuar në gurë të ekspozuar në kushte ekstreme presioni dhe temperature, si ato që gjendjen në thellësi mes 410 dhe më shumë se 660 kilometra, ose mes kufirit të mantelit të sipërm dhe atij të poshtëm, që janë shtresat mes kores dhe bërthamës së tokës.

Ndërsa shumica e diamanteve të tjerë krijohet në thellësi mes 150-200 kilometra.

Sipas hipotezës së studiuesve, boroja i oqeaneve antikë është futur në gurë që quhen gjarpërues. Më pas këta gurë dërgohen në thellësi nga lëvizjet e pllakave të tokës dhe aty lëshojnë ujin që marrin me vete.

Pjesa më e madhe e ujit ngjitet drejt sipërfaqes së tokës, por një fraksion i vogël mbetet i bllokuar në minerale të tjera të cilat transportohen në thellësi edhe më të mëdha, ku në një farë pike lëshojnë një lëng që përmban boron e oqeaneve antike dhe elemente të tjera.

Nëse mes këtyre elementëve ka mjaftueshëm karbon, elementi nga i cili bëhen diamantet, krijohen xhevahire blu, sepse boroja zëvendëson disa prej atomeve të karbonit.

Pra diamantet luajnë një rol thelbësor në të kuptuarin se si Toka është transformuar në kohë dhe janë një provë më shumë e riciklimit të kores në mantelin e tokës.

Madje tregojnë gjithashtu se mineralet e pasur me uji futen më në thellësi të mantelit të tokës nga se mendohej deri tani dhe kjo tregon se ekziston riciklimi i ujit edhe në thellësitë e Tokës./ KultPlus.com