Kryetari i Komunës së Prishtinës, Shpend Ahmeti së bashku me Ambasadorin francez në Kosovë Didier Chabert dhe me nënkryetarin e Komunës së Parisit, Christophe Girard biseduan për bashkëpunime të mundshme kulturore në mes Prishtinës dhe Parisit, shkruan KultPlus.

Komunën e Prishtinës e vizitoi dje nënkryetari e Komunës së Parisit, Christophe Girard, bashkë me Ambasadorin francez në Kosovë, Didier Chabert. Ata u pritën nga kryetari Shpend Ahmeti, nënkryetari Selim Pacolli, si dhe drejtorët Muhedin Nushi dhe Yll Rugova.

“Përgjatë këtij takimi u diskutua për thellimin e bashkëpunimit mes dy vendeve, sidomos në sektorin e kulturës. Kësisoj, do të marrim shembuj të mirë nga Parisi si për mbrojtjen e objekteve të rëndësisë së veçantë, ashtu edhe për shfrytëzimin e hapësirës publike për projekte të ndryshme kulturore”, thuhet në njoftimin e Komunës së Prishtinës./KultPlus.com