Në prag të 10 vjetorit të pavarësisë po bëhet thirrje për nënshkrimin e një peticioni on-line në Facebook. Ky peticion po kërkon vendosjen e flamurit të Republikës së Kosovës në hyrje të Prishtinës, konkretisht “Te Rrethi”.

Në këtë pjesë aktualisht është i vendosur flamuri i Shqipërisë.

Kjo nismë kërkon vendosjen e flamurit të Kosovës “Te Rrethi”, krahas atij Kombëtar.

“Nuk jemi kundër flamurit kuq e zi, i cili ka një simbolikë për gjithë kombin tonë, mirëpo për festen e 17 shkurtit – dhjetë vjetorit të pavarësisë së Kosovës nga komuna e Prishtinës dhe kryetari i saj Shpend Ahmeti kërkojmë që të vendoset flamuri i pavarësisë, pra flamuri i Republikës së Kosovës????????”, sqarohet në këtë nismë.

Një faqe në Facebook e krijuar nga katër persona po bën thirrje që kjo të ndodh në prag të 10 vjetorit të Pavarësisë së Kosovës.

Së fundmi flamuri Kombëtar u hoq nga kjo pjesë e kryeqytetit për një kohë të shkurtër nga një artist. Në vend të tij u vendos flamuri offside. Artisti kishte sqaruar se këtë vepër arti e kishte bërë për të paraqitur realitetin dëshpërues të Kosovës. / KultPlus.com