Monumenti i Luigj Gurakuqit është lënë pas dore.

Lajmin e japin vetë shkodranët, të cilët denoncojnë me foto gjendjen e shtatores së personalitetit Luigj Gurakuqi, një monument që duhet mirëmbajtur në çdo kohë, pasi është krenari, kujtesë e këtij vendi.

“Për Bashkinë apo institucionet e tjera, këto vepra shërbejnë vetëm për Ditën e Pavarësisë e nuk mendojnë që duhen respektu duke u kujdes për shtatoren e tyne me riparime apo ruajtje”, shprehet aktivisti Mirsad Basha ndërsa shton se monumentet mund të shërbejnë dhe si aktraksione turistike, në prezantimin e në qyteti në menyrën më të bukur.

Luigj Gurakuqi (Shkodër, 20 shkurt 1879 – Bari, 2 mars 1925) qe veprimtar i çështjes kombëtare, hartues dhe nënshkrues i Deklaratës së Pavarësisë së Shqipërisë, poet, arsimtar, tekstolog, gjuhëtar, diplomat e deputet. Është një nga personalitetet më të shquara të lëvizjes sonë kombëtare, arsimore e kulturore në fundin e Rilindjes Kombëtare dhe të fillimeve të Pavarësisë duke përjetuar ngjarjet më kulmore të jetës së vendit në çerekun e parë të shekullit tonë në shumicën e të cilave në mos organizator, qe pjesëmarrës i drejtpërdrejtë. Në shkrimet e tij përdorte emrat e pendës Jakin Shkodra e Lek Gruda. / KultPlus.com