Organizata anti-NATO në Mal të Zi do të shënojnë 19 vjetorin e bombardimit të Aleancës Perëndimore të Jugosllavisë me një ceremoni në kishë ku do të marrin pjesë edhe veteranë lufte rusë.

Serbët e Malit të Zi dhe organizatat anti-NATO, së bashku me Kishën Ortodokse Serbe, do të mbajnë një përkujtimore pranë qytetit bregdetar të Tivatit të shtunën për të nderuar viktimat e bombardimeve të NATO-s që filluan më 24 mars 1999.

Në përkujtimoren e këtij viti do të marrin pjesë edhe përfaqësues të shoqatës së veteranëve rusë të luftës.

Një nga organizatorët, Gojko Raiceviç, nga lëvizja “JO NATO”, shprehu zemërimin se Mali i Zi ishte i vetmi vend që u bë anëtar i NATO-s pasi u bombardua nga aleanca ushtarake perëndimore.

“Një bashkim i terrorizmit ndërkombëtar dhe krimit të organizuar ka çuar në faktin se po shënojmë 19 vjetorin e agresionit të NATO-s, ndërsa jemi edne të pushtuar nga të njëjtët agresorë,” tha Raiceviç për BIRN.

Organizatorët e tjerë të përkujtimores janë Vëllazëria Rinore Ortodokse në Mali të Zi, veteranët e forcave ajrore jugosllave dhe organizata pro-serbe Matica Boke.

“Një liturgji dhe përkujtimore për të gjithë të vdekurit në bombardimet e vitit 1999 do të mbahet nga peshkopi Joanikije me klerin,” thanë organizatorët në një deklaratë.

Nëntëmbëdhjetë shtete të NATO-s, duke përjashtuar Greqinë, nisën trupat e tyre për fushatën 78-vjeçare të sulmeve ajrore në Jugosllavi, e cila në atë kohë përbëhej nga Serbia dhe Mali i Zi.

Operacioni u nis pa një mandat të Këshillit të Sigurimit të OKB-së, për shkak të kundërshtimit nga aleatja e Jugosllavisë, Rusia, gjë e cila ka shkaktuar akuza se kjo nuk ishte e ligjshme.

Bombardimet e NATO-s vranë dhjetë vetë në Mali të Zi, nëntë prej të cilëve ishin civilë.

Gjashtë civilë, përfshirë tre fëmijë, u vranë në një sulm ajror në një urë në fshatin Murino në Malin e Zi më 30 prill 1999.

Familjet e viktimave paditën shtetin në vitin 2007 për shkak se autoritetet malazeze nuk arritën të lëshonin një alarm urgjence në Murino përpara bombardimit të urës, edhe pse sirenat në qytetin aty pranë të Plavës ranë.

Gjykata në Podgoricë i hodhi poshtë në vitin 2015 të gjitha paditë për kompensim, duke vendosur se pretendimet ishin të vjetruara.

Mali i Zi u bë anëtari i 29-të i NATO-s në qershor 2017.

Dusica Tomovic BIRN Podgoricë