Kryetari i Prishtinës, Shpend Ahmeti, ka liruar nga detyra e Drejtorit të Drejtorisë së Arsimit, Jonuz Salihajn.

Lajmin për Express e ka konfirmuar edhe Zëdhënësi i Komunës së Prishtinës, Adonis Tahiri, i cili ka thënë se lirimi nga detyra i Salihajt është bërë me kërkesë të partisë së tij, AAK’së.

“Me kërkesë të partnerit të koalicionit (AAK), z. Salihaj është liruar nga detyra që i është caktuar ne fillim të këtij mandati”, ka thënë Tahiri për Express.

Kujtojmë se në muajin nëntor të vitit 2018, Shpend Ahmeti ka shkarkuar nga detyra dy drejtorë, Nora Kelmendin nga Drejtoria e Kadastrit dhe Arben Vitinë nga Drejtoria e Shëndetësisë, të dy anëtarë të Vetëvendosjes. E pas shkarkimit të tyre, pati dhënë dorëheqje Yll Rugova, nga Drejtoria e Kulturës.

Me lirimin nga detyra të Jonuz Salihajt, aktualisht Komuna e Prishtinës ka mbetur pa drejtor të Drejtorisë së Kadastrit, Kulturës dhe Arsimit, ndërkaq ai i Shëndetësisë është zëvendësuar. / KultPlus.com