Skulptori Agon Qosa tashmë ka përfunduar shtatoren e Anton Çetës. Mirëpo kjo e fundit ka mbetur në atelenë e tij, për shkak që akoma nuk është caktuar lokacioni.

Ndërkohë edhe kompleti i librave të veprimtarisë së tij, akoma ka mbetur i papërfunduar. E buzëqeshur e me një dorë të zgjatur si për pajtim, ka muaj që shtatorja e Anton Çetës, po qëndron e përfunduar në atelenë e skulptorit, Agon Qosa.

Më 22 tetor është bërë pranim-dorëzimi i shtatores, mirëpo lokacion për të nuk ka. Qosa nuk e di edhe sa ky punim do të qëndrojë i mbyllur në atelenë e tij. Muaj më parë, ishte kundërshtuar ideja që kjo shtatore të vendoset para Institutit Albanologjik. Ndryshe nga skulptori, nga Instituti akoma vlerësojnë se hapësira është e vogël. Sipas sekretarit shkencor të Institutit Albanologjik, Lulëzim Lajçi, për Anton Çetën ata kanë bërë diçka edhe më të madhe.

Por për këtë komplet prej 13 veprash, nuk u ndanë mjetet nga MASHT’i, sipas Lajcit. E ministri i tashëm i Arsimit, Shyqiri Bytyqi tha se ka pasur disa problem të tjera. Ndërsa për shtatoren e Anton Cettës, nënkryetari i Komunës së Prishtinës, Selim Pacolli tha se të hënën e javës së ardhshme do të propozohen disa lokacione ku të vendoset shtatorja para grupit nismëtar./KultPlus.com