Viktima e dhunës seksuale në Kosovë, Vasfije Krasniqi-Goodman, ka rrëfyer në InfoMagazinë tmerrin e saj që e përjetoi gjatë luftës në Kosovë, shkruan Albinfo.ch.

Ajo kërkoi që të gjithë të jenë përkrahës të grave që kanë kaluar një gjë të tillë.

“Unë jam befasuar me përkrahjen dhe mbështetjen që e kam marrë pasi kam dalë publikisht. Dua që edhe viktimat e tjera të dhunës seksuale ta kenë mbështetjen si unë – jo vetëm Vasfija që doli publikisht”, tha ajo.

Sipas saj, ka gra që kanë histori të ngjashme me të, por shoqëria i bënë të mos ndihen rehat për t’u rrëfyer.

“Ka gra që e kanë mbështetjen e bashkëshortit, vëllezërve, motrave dhe familjes, por shoqëria i bën të mos ndihen rehat që ta ndajnë rrëfimin  e tyre, prandaj mbështetja për to nuk është e mjaftueshme”, tha Vasfije Krasniqi.

Vasfija gjithashtu këto ditë vizitoi edhe vendin ku ishte përdhunuar seksualisht nga policia serbe.

Ajo rrëfeu se si u ndje në ato momente.

“Kthimi në atë vend ka qenë i vështirë, por ka qenë edhe forcë për mua që t’u tregoj të gjithëve se ne përsëri ia dalim”, tha ajo.

Ajo shtoi se në atë kohë kur Vasfija ishte shumë e re nuk kishte forcë, por sot ajo ka mbështetje dhe forcë të madhe.

“Kjo është edhe një mesazh për kriminelin që e kreu krimin që t’i tregojë atij se ai atë ditë, para 20 vjetësh, e ka pasë forcën më të madhe se unë, por tash ai nuk e ka forcën më të madhe se unë”, rrëfente Vasfija.