Ditë më parë në Vuthaj të Plavë-Gucisë ka përfunduar ndërtimi i Shtëpisë së Kulturës, në saje të kontributeve të banorëve të këtij fshati në zemër të Alpeve Shqiptare, që mërguan në Shtetet e Bashkuara të Amerikës që nga vitet e gjashtëdhjeta të shekullit të kaluar e deri në ditët tona.

Ky objekt, që u mungonte shqiptarëve të kësaj krahine, tashmë është pajisur edhe me mobilie dhe pritet që në ditët e ardhshme aty të zhvillohen aktivitetet e para kulturore. Ajo do të shërbejë edhe nevoja të tjera të komunitetit, siç bën të ditur portali Plava e Gucia Sot.

Sot në këtë fshat ka filluar edhe festivali mbarëkombëtar i këngëve dhe valleve shqipe, që do të vazhdojë edhe nesër, ndërsa më 1 gusht këtu do të mbahet tubimi tradicional “Mirësevini në Alpet Shqiptare”, që organizohet nga shoqata me këtë emër, “Alpet Shqiptare”.