Mbrëmjen e djeshme kanë mbërritur në Tepelenë një grup shkencëtarësh nga Universiteti “BOKU” i Vjenës.

Mes natyrës së parkut të Shelgut, qetësisë që të ofron Vjosa dhe simfonisë së zogjve, shkencëtarët kanë zgjedhur të kalojnë natën me çadra, duke shijuar kënaqësitë që të fal natyra e kësaj zone.

“Kjo përpjekje e grupit të shkencëtarëve ndërkombëtarë, është në vazhdimin e iniciativës së tyre, për të kryer kërkime të karakterit shkencor në lumin, të cilin ata e konsiderojnë të fundit natyror në kontinentin europian. Kjo tregon edhe një herë që, përveç vlerave të tjera, Vjosa përbën një laborator të madh në natyrë.

Këto kërkime do të përpiqen të hedhin më shumë dritë mbi ndikimet që do të kenë dy hidrocentralet e planifikuar në Kalivaç dhe Poçem”, – shprehet Olsi Nika, drejtor ekzekutiv i Ecoalbania.

Tepelena pritet të jetë stacioni i nisjes me varka i këtyre kërkimeve, të cilat do të vijojnë deri në grykëderdhjen e saj./ata